वैदेशिक रोजगारीमा जाने नागरिकका लागि श्रम स्वीकृति तथा आपतकालीन उद्धार सेवा स्थानीय तहबाटै सञ्चालन हुन थालेपछि नागरिकलाई प्रत्यक्ष लाभ पुगेको छ। स्थानीय तहमा रहेका रोजगार सेवा केन्द्रमार्फत यस प्रक्रिया सहज र प्रभावकारी बन्दै गएको छ।
रोजगार सेवा केन्द्रको प्रभावकारिताका कारण अब नागरिकले श्रम स्वीकृतिका लागि लामो दुरी यात्रा गर्नुपर्ने झन्झटबाट मुक्ति पाएका छन्। यसबाहेक, वैदेशिक रोजगारीमा गएका नागरिक अप्ठेरोमा परेमा उनीहरूको उद्धार तथा राहत सेवासमेत स्थानीय तहबाटै सहजीकरण हुन थालेको छ।
मिक्लाजुङ गाउपालिकाका रोजगार संयोजक क्षितिज चेमजोङका अनुसार , "हामीले रोजगार सेवा केन्द्रलाई अझ प्रभावकारी बनाउँदै लगिरहेका छौं। नागरिकलाई आवश्यक रोजगारी सम्बं सेवा यहींबाटै उपलब्ध गराउन सकेमा समय, खर्च र झन्झट दुबै कम हुनेछ।"
स्थानीय तहमा नै श्रम स्वीकृति र उद्धार सेवा सञ्चालन हुन थालेपछि नागरिकलाई आफ्नो अधिकारबारे सहज जानकारी प्राप्त गर्न सहयोग पुगेको छ। विभिन्न अन्तर्राष्ट्रिय श्रम सम्झौता, कानुनी प्रावधान तथा विदेशमा देखिने समस्याबारे सचेतना फैलाउने कार्यसमेत स्थानीय तहबाटै गर्न थालिएको छ।
यस सेवाबाट लाभान्वित भएका धेरै नागरिकमध्येका एक, मोरङका रमेश दहाल भन्छन्, "पहिले श्रम स्वीकृतिका लागि काठमाडौं जानुपर्ने हुन्थ्यो। तर, अब स्थानीय तहमै सबै प्रक्रिया पूरा गर्न सक्ने भएकाले समय र खर्च दुबै जोगिएको छ।"
वैदेशिक रोजगारमा गएका नागरिक अप्ठेरोमा परेमा उद्धार गर्नुपर्ने अवस्था बेलाबेलामा आउने गर्छ। यसअघि केन्द्र सरकारका निकायहरूबाट मात्र यस्तो कार्य हुने गरेकोमा अहिले स्थानीय तहबाटै प्राथमिक उद्धार, राहत तथा आवश्यक कानुनी परामर्श सेवा उपलब्ध हुन थालेको छ।
विशेषगरी, खाडी मुलुकहरू र मलेसियामा कार्यरत नेपाली कामदारले समस्या भोग्नुपरेका घटनाहरू बढ्दै गएका छन्। त्यस्ता अवस्थामा स्थानीय रोजगार सेवा केन्द्रहरूले आवश्यक विवरण संकलन गरी सम्बन्धित निकायहरूसँग समन्वय गर्ने प्रणाली विकास गरिएको छ।
स्थानीय तहबाटै वैदेशिक रोजगारीसम्बन्धी सेवा प्राप्त हुन थालेपछि, श्रम स्वीकृति लिनका लागि काठमाडौं वा अन्य प्रमुख शहर धाउनु पर्ने बाध्यता हट्दै गएको छ। साथै, उद्धार तथा राहत सेवा थप प्रभावकारी बनाइँदा, आपतमा परेका नेपाली नागरिकलाई शीघ्र सहायता उपलब्ध गराउन सकिने अपेक्षा गरिएको छ।
यस योजनाले दीर्घकालीन रूपमा वैदेशिक रोजगारी व्यवस्थापनलाई प्रभावकारी बनाउने विश्वास स्थानीय सरकारको छ।
श्रम स्वीकृति तथा उद्धार सेवा स्थानीय पालिकाबाट, वैदेशिक रोजगारी सहज बन्दै
COMMENT
.